აღმოაჩინე კახეთი Travel Art-თან ერთად!

კახეთში ღვინოზე საუბარს ბევრი შესავალი არ სჭირდება. საკმარისია მასპინძელს ჰკითხო, როგორი მოსავალი ჰქონდა, და საუბარი ვენახს, ამინდს და გასული წლის მოსავლის ამბებს გადასწვდება.

ასეთი საუბრის შემდეგ დეგუსტაციას სხვაგვარად უყურებ. ჭიქაში დასხმულ ღვინოს უკვე ადამიანის შრომას, მის ვენახსა და გამოცდილებას უკავშირებ.

წინანდალში მოგზაურობა ღვინისა და კულტურის ისტორიას აერთიანებს. ალექსანდრე ჭავჭავაძის სახლ-მუზეუმსა და ენოთეკაში იმ ოჯახის ცხოვრებას ეცნობი, რომლის სახელიც კახეთში ღვინის წარმოების ევროპული ტრადიციის აღორძინებასთანაა დაკავშირებული. შემდეგ ბაღში გადიხარ, ბილიკებს მიუყვები და თავს ალექსანდრეს ეპოქაში წარმოიდგენ.

თელავში ერეკლე მეორის სასახლესა და ეთნოგრაფიულ მუზეუმს ვსტუმრობთ. შერჩეული მარშრუტის მიხედვით, ტურს იყალთო, ალავერდი ან შუამთა ემატება. თითოეულ მათგანს თავისი გარემო აქვს: ზოგან ტაძრის მასშტაბი გაკვირვებს, სხვაგან ეზო, ძველი კედლები ან ტყეში მიმავალი გზა. ამ გაჩერებებს შორის კახეთის პეიზაჟებიც მუდმივად იცვლება.

კახურ სამზარეულოსთან გაცნობა შოთის გამოცხობითა და ჩურჩხელის მომზადებით გრძელდება. მასპინძლის ხელში ყველაფერი მარტივად ჩანს, თუმცა პირველივე მცდელობაზე ხვდები, რამდენი პრაქტიკა სჭირდება თითოეულ მოძრაობას. სამაგიეროდ, პროცესში მონაწილეობას თავისი ხალისი აქვს - განსაკუთრებით მაშინ, როცა ბოლოს შედეგსაც ერთად აგემოვნებთ.

შემოდგომაზე კახეთში მოგზაურობას რთველის განსაკუთრებული ხალისიც ემატება - ყურძნის კრეფა, საწნახელში მისი დაწურვა და დღის ბოლოს საერთო სუფრასთან შეკრება. ამ ტრადიციაში მონაწილეობით კახურ ყოფასა და მასპინძლობას კიდევ უფრო ახლოს გაიცნობ. რთველის თარიღი ყურძნის სიმწიფისა და ამინდის გათვალისწინებით განისაზღვრება.

Travel Art-ის კახეთის ტურებში შეგიძლია შენთვის საინტერესო მიმართულება აირჩიო: ღვინო, ისტორია, გასტრონომია ან რთველი. შემოგვიერთდი ჩვენს ტურებში და ერთად აღმოვაჩინოთ მადლიანი კახეთი!